समाचार

बाढी प्रभावित क्षेत्रमा निःशुल्क स्वास्थ्य शिविर

 

यदुराज मिश्र नेपालगंज : बुधबार ३२ साउन २०७४ / बाढी प्रभावित क्षेत्रका स्थानीयबासी बिरामी पर्न थालेपछि राष्ट्रीय जनता पार्टी राजपा नेपालले आज बाँकेको डुडुवा गाउँपालिकामा निःशुल्क स्वास्थ्य शिविर सञ्चालन गरेको छ । एम्बुलेन्ससहित राजपाको टोली स्वास्थ्य शिविर लिएर त्यहाँ पुगेको हो । डुडुवाको वडा नं. १ होलियास्थित पिप्रहवा, खडैचा र टेपरी गाउँमा सञ्चालन गरिएको निःशुल्क स्वास्थ्य शिविरमा ३ सय २५ जनाले स्वास्थ्योपचार गराएका छन् । शिविरमा राहतस्वरुप नमकीन, भुजालगायतको खाद्यान्नसमेत वितरण गरिएको राजपाका केन्द्रीय सहमहामन्त्री पशुपतिदयाल मिश्रले बताउनु भयो । राजपा नेपालको आग्रहमा भेरी अञ्चल अस्पताल नेपालगञ्जमा कार्यरत डा. ओमप्रकाश मिश्रको नेतृत्वमा गएको टोलीले स्वास्थ्य सेवा प्रदान गरेको उहाँले बताउनु भयो । स्वास्थ्य परीक्षणका साथै डा. मिश्रले निजी श्रोतबाट करीब ४० हजार मूल्य बराबरको निःशुल्क औषधि समेत वितरण गरेको राजपाका सहमहामन्त्री मिश्रले जानकारी दिनुभयो । शिविरमा अधिकाँशतयः रुघाखोकी, ज्वरो आउने, टाउको दुख्ने, डायरियाका विरामीले स्वास्थ्य सेवा लिएको उपचारमा संलग्न डा. ओमप्रकाश मिश्रले बताउनु भयो । त्यहाँ आएको बाढीका कारण स्थानीयबासीहरुमा झाडापखाला, ज्वरो आउने, टाउको र पेट दुख्ने, आँखा पाक्ने र छालामा खटिराको समस्या देखिएको छ । बाढीले पिउने पानी र वातावरण दूषित भएपछि बाढीग्रस्त क्षेत्रमा भाइरल लगायतका संक्रमण देखिन थालेको डा. मिश्रले बताउनु भयो । डुडवा गाउँपालिकामा राप्ती नदी आसपासका स्वास्थ्य चौकीहरू पनि बाढीको डुबानमा परेका छन् ।